政情：會考耿耿於懷 吳克儉惡補英文
雖然香港中學會考已成為歷史，但現今大部分香港人都有經過會考洗禮，連考試及評核局主席吳克儉都唔例外，佢當年讀名牌中文中學，但英文會考成績就唔多理想，不過反而刺激佢喺會考後更加勤奮學英文，終生受惠。
考評局尋日起一連三日舉行資訊日，展出部分會考准考證、會考證書等，主席吳克儉見到都話好有親切感，事關當年佢讀老牌名校金文泰中學，一九七一年應考會考，七二年讀完中六後就直入中文大學。
拒透露成績
不過佢對自己嘅英文會考成績相當唔滿意，耿耿於懷，不過咁反而成為學習推動力，課餘、工餘時間報讀夜中學英專課程、英國文化協會課程等，惡補英文。究竟佢會考成績係點？吳主席只係肯講自己有「九條尾」，即係九科都係C級或以上，咁睇嚟吳主席嘅自我要求都幾高噃。
佢仲記得當年唔怕唔記得起身去考試，亦唔怕唔記得帶應考工具等等，皆因吳媽媽仲緊張過佢，每日提點，一定無失拖咁話。所以話，會考對香港人嚟講，都可以話係一個集體回憶。