政情：夏佳理跣腳馬步穩
作為一位成功人士，喺邊度跌低就喺邊度企番起身，兼且要查找不足，了解自己跌親嘅原因。好似行政會議成員夏佳理（Ron）咁，尋日佢喺政府總部門口差啲跣親，不過平衡力極佳嘅佢，一個馬步企番穩，唔通佢食過吓夜粥？
尋朝天氣寒冷，仲帶住幾陣微雨，可能因此令政府總部嘅雲石地板變得濕滑。當阿Ron喺門口踩過紅地氈，準備一個箭步走上樓梯出席行會嘅時候，突然間跣咗一跣，成個人差啲向後跌。須知道阿Ron年紀都唔細，萬一跌一跤真係可大可小。
幸好阿Ron臨危不亂，一隻腳跌親仲有另一隻腳撐住，成個原地筆直企番喺度。雖然佢趕住去開行會，不過就一啲都唔自私，無不顧而去，仲轉身望吓地下有無咩異樣，等其他人唔會中招，好為人着想，相當難得！