中環出更：林D9夫婦聖誕Shopping晒恩愛
政改方案通過後，政制及內地事務局局長林瑞麟（林D9）一身鬆晒，本地立法諮詢工作有副局長黃靜文分擔同跟進，所以今個聖誕節放假心情特別愉快，前日下晝辦公時間仲拖住太太去中環行街買聖誕禮物。相反同樣去買聖誕禮物嘅運輸及房屋局副局長邱誠武，雖然攞正牌休假，但一見卓妮就好避忌，隨即接聽手提電話及急步離開。
政府尋日刊登憲報，林D9會喺下周一起放兩日假，之後一月五日又請假，到十日為止。不過，卓妮前日下晝三點鐘就喺中環太子大廈遇到林D9兩公婆拖手仔行街Shopping，林D9手上挽住一袋法國La Maison du Chocolat朱古力，佢話係送畀朋友嘅聖誕禮物，跟住兩人雙雙登上局長座駕離開。卓妮見林D9同太太行街，一如過往咁全程翹住太太隻手，幾時都咁恩愛，一路行一路講個不停，但林太就默默做聽眾，堪稱政壇模範夫妻！
邱副放假放得唔自在
其實喺林D9出現前一小時，卓妮又喺太子大廈二樓間「PICTURE THIS」藝廊遇到邱誠武睇書，呢間畫廊頗具名氣，中式服裝店「上海灘」創辦人鄧永鏘都係熟客仔。邱副局前日開始放聖誕假，但仍然着得西裝骨骨行街街，佢戴咗一條英國米字旗嘅藝術領呔、左手夾住一份聖誕禮物喺藝廊入邊睇嘢，期間睇咗幾本畫冊，又同店舖嘅外籍負責人傾咗一陣，約十五分鐘後離開。不過，邱副局行出門口時見到卓妮，隨即攞起手提電話，然後急步離開，諗唔到佢放假都放得咁唔自在！
雖然邱副局放緊假，但都有參加運輸及房屋局尋日下晝喺金鐘力寶軒搞嘅聖誕Party。話說邱副局負責抽獎，點知抽到其中一個時，等咗好耐都無人領獎，後來台下有人通報，中獎嗰個冧巴原來係邱副局自己，但佢就攞番出嚟再抽過，等其他同事多個機會。估唔到邱副局唔止好運氣，仲好識做人添！
不過，局長鄭汝樺仲識做人，私人掏荷包捐三千元禮券畀下屬抽獎，等大家歡度聖誕節。
卓妮