中環出更：霍震宇玩唔掂Galaxy Tab
廣東社團總會前日舉行周年會員大會，並為十九位獲授勳及委任為太平紳士嘅會員慶祝，獲頒大紫荊勳章嘅行政會議成員梁智鴻及幾位太平紳士都有到場。當大會頒發紀念獎座畀受勳人士期間，卓妮就發現台下嘅副主席霍震宇，耷低頭入晒神把玩手上嘅平板電腦，睇真啲原來係新出無耐嘅Samsung Galaxy Tab。
張國榮聖誕海口打高球
雖然Samsung Galaxy Tab係霍震宇新寵，但佢仲未好識用，見佢用手指喺部機嘅螢幕上篤篤吓，但篤來篤去都篤唔到，於是向卓妮求救。原來震宇想copy（複製）一份文件，正常做法係要用手指按實個文件圖案才能出現複製功能，但佢只係點一點個文件圖案就縮開手，所以複製唔到。震宇話，部機只係買咗三至四日，用嚟睇公司文件，但現階段仲學緊點用喎！
卓妮同場又見到會員之一嘅建滔化工老闆張國榮。佢透露獲觀瀾湖老闆朱樹豪邀請，聖誕節到被喻為「月球」嘅海南島海口觀瀾湖高爾夫球渡假村玩兩日，同行仲有主席王國強及律師簡松年等人，大家齊齊度過一個暖笠笠嘅聖誕節。
至於「金刀梁」梁智鴻就話聖誕節會留番喺香港，幾十年來如是，事關香港醫學會及牙醫學會每年喺呢段時間都有好多活動，佢每年都有參加，而喺英國工作嘅囡囡，本來打算返香港過聖誕，點知遇上歐洲大風雪，惟有取消行程，留番喺英國過白色聖誕。