政情：C18經費 大輝包底
立法會廠商會代表林大輝籌組嘅C18（社區十八）成立將近半年，但市民嘅認知度唔高。C18召集人林大輝尋日與多名成員出席電台節目時，齊齊為C18洗底，一時強調旗下成員好多都係基層出身，一時又話C18代表跨階層政團，乜都佢講晒。不過，大輝講得最清晰嘅係，C18經費係由佢包底。
大輝過去一直無清楚交代C18嘅經費來源，但尋日對住班政壇新秀就好坦白話：「作為召集人，喺經費上係責無旁貸，經費係來自本人！」此言一出，在場人士無不嘩然，果然好豪氣！究竟大輝背後仲有冇人支持就唔知嘞，但為理念相同就出錢出力支持三十多個議員搞地區工作，實力相當雄厚。成員之一嘅沙田區議員湯寶珍就話：「大輝出雞，我哋都要出豉油㗎！」
對於基層與商界出現矛盾引發仇商情緒，大輝直言話，本港百分之九十八都係中小企業，多數老闆係草根出身，明白基層市民需要，所以佢相信仇商情緒只係個別事件。佢以自己為例話：「我作為小商人，唔覺畀人仇視；即使落區工作，都唔覺畀人用唔好嘅眼光望我或批評我！」