政情：梁君彥忙裏偷閒四圍行
自由黨領導層近日立立亂，相對分家出去嘅經濟動力「4L」就愈做愈順。上周三開立法會大會，當日下晝四點鐘，咁啱我哋喺中環ifc行人天橋遇到經濟動力梁君彥（Andrew），見佢沿天橋行到太子大廈再返立法會，步履輕快，期間到過個人護理產品店、超級市場及影音店舖睇嘢，若非政團事務同生意搞得好，邊有閒情逸致行街Shopping吖！
Andrew先到太子大廈三樓「萬寧」睇貨品，睇睇吓仲踎低身細心研究，大約三分鐘後無買任何嘢離開。Andrew繼而落二樓周圍行，行到Oliver’s超級市場時，就到葡萄酒區睇紅酒及做特價嘅禮盒裝法國香檳，莫非想買聖誕禮物？不過，佢睇咗十分鐘都睇唔啱，之後索性行到一間雷射影音店門外，駐足細心觀看櫥窗上產品，又係無斬獲，睇咗一陣就離開。
Andrew離開太子大廈時咁啱落緊雨，佢好醒目行落港鐵站，沿地下通道行到最接近立法會大樓嘅出口。雖然路程比穿過皇后像廣場直接返立法會行遠咗，但就唔使濕身，況且行多啲路有益身體。Andrew咁識忙裏偷閒，果然做咗議員咁耐都無倦意。
