中環出更：寧波同鄉會家鄉菜正絕
寧波與上海密不可分，連菜式亦幾乎混為一體；如果要區分，寧波菜嘅特色乃以醃製為主，好似鹹魚、臭豆腐、臭莧菜等，都係佢哋嘅經典菜式。
全國人大代表李宗德原來都係寧波人，去年上任寧波旅港同鄉會會長無耐，就積極推介該會會所嘅炸臭豆腐，近日佢再推介多幾味菜式，包括葱油家常餅、油淋雞及桂花芝麻湯圓，其中湯圓更加係工業總會主席孫啟烈嘅至愛。
李宗德話，炸臭豆腐及葱油家常餅好多地方都有得食，但佢覺得最好食嘅，都係位於中環德己立街二至十八號佢哋旗下會所嘅出品，食落鬆化又香口。會所廚師毛重康話，當收到供應商嘅臭豆腐後，會用保鮮紙包住放入雪櫃發酵一晚，收乾水分後再落鑊炸，由慢火到中火炸到外皮鬆脆。「葱油家常餅」嘅做法係先將葱花切粒後吹乾，加入鹽同糖，混合已發好嘅麵粉煎香，麵粉發得好，食落自然鬆軟。
一日前訂油淋雞
至於油淋雞煮法同炸子雞分別不大，只係最後加多個步驟，淋上由豉油及醋等醬料製成嘅醬汁，為保持最佳水準，毛師傅話最好一日前預訂，否則雞隻唔夠乾身，就炸得唔夠香脆。最後要講講桂花芝麻湯圓，糖水加入桂花，味道清香，令普通嘅芝麻湯圓增添靈魂。