政情：胡文新低調現身撐老友
Sony PS3《Gran Turismo 5》（GT5）3D賽車遊戲上月推出後即震撼全城，作為Sony Computer Entertainment Hong Kong Limited市場部總經理項明生（James）梗係心情興奮，仲獲好友合和實業董事總經理胡文新（Thomas）力撐，尋日借出灣仔合和中心廣場畀佢擺攤位推廣新遊戲。不過，神秘現身嘅Thomas好低調，講明唔接受訪問。
James尋日特別為《GT5》安排車王挑戰賽，喺下午兩點半鐘頒獎禮之後，一身便服打扮、戴住印有「PS3」鴨嘴帽嘅Thomas突然喺合和中心地下間德國餐廳大門側現身，與James密斟咗約十五分鐘，但Thomas一見到記者在場，隨即喺職員嘅掩護下返回合和中心辦公室。
James就爆料Thomas鍾意打機，好似新出嘅《GT5》賽車，仲有機動戰士高達遊戲，都係佢「飛弗」！不過James未試過同Thomas網上連線打機，話鍾意自己玩單打多啲。