政情:謝凌潔貞唔恨步步高升

勞工處處長謝凌潔貞做埋呢個禮拜,下月十三日就調去教育局做常任秘書長,佢尋日同傳媒臨別茶敍,講吓自己三年幾處長嘅經驗。謝太話做處長以來都發生過唔少工潮,有幾次仲親身去斡旋,最難忘係上任唔夠一個月,就發生紮鐵工潮,搞足個幾月,無幾耐又發生塌天秤意外,第一次着安全鞋落地盤,仲因為無着襪搞到刮損腳添。

自愧不及張建宗

至於嚟緊接手做勞工處處長嘅卓永興工作態度令人擔心,謝太就話同佢都係同期入政府,仲一齊去過牛津進修,當年卓仲幫佢擊退賊仔。

講到上司勞工及福利局局長張建宗,謝太賣口乖,讚局長記性好,任何數字都記得準確無誤,仲自嘲話:「我自己都已經好勤力,局長係超級勤力!」搞到佢好自卑喎。不過佢唯一學唔嚟嘅,就係局長唔放假瞓身做嘢,事關佢點都要放假休息吓照顧兩個女,所以佢無興趣做局長,大家唔使恭賀佢步步高升。

下月就去教育局,咁啱遇着審計署炮轟直資學校財政混亂,做過教統局嘅謝太淡定話會搞得掂,因為當年佢處理過審計署揭英基財政混亂風波,仲話審計署不時驗吓身都係好事。

Money18新功能「18好路數」為你預測心水股票升跌機會率