政情：麥列菲菲告別英基為抱孫﹖
麥列菲菲尋日宣布，為個人專業發展同抽多啲時間陪伴屋企人，包括佢期待已久嘅第一個寶貝孫，決定辭任英基學校協會管理局主席一職，明年三月生效。麥列菲菲任內對英基嘅貢獻都唔少，唔單止協助英基走出困境，仲重組以往過時兼複雜嘅協會架構。不過佢突然辭任，莫非真係抱孫咁簡單﹖
「七年之癢」請辭恰時
英基早年經常被批評財務管理不善，身兼香港醫務委員會主席及私家醫生嘅麥列菲菲，自○四年起擔任英基學校協會管理局主席，當時啱啱係英基陷入困境嘅時候，喺佢在任期間，不但促成立法會通過一項修訂條例草案，令原本過時及複雜嘅協會架構，改組成一個由直選家長代表、獨立成員、校董會主席委員會代表及代表職員組成嘅全新管理局。
麥列菲菲形容此時請辭係最恰當嘅時間：「我已出任了差不多七年主席，七年是一段不短的時間，我希望將來可以有更多時間陪伴我的家人。」英基學校協會管理局已成立遴選委員會，物色麥列菲菲嘅接班人。