中環出更：楊鼎立解開神奇手帶之謎
Grounded手帶風靡社交圈，但手帶並無專門店，背景好神秘。卓妮明查暗訪，終於解開手帶之謎，原來Grounded手帶係由已故全國政協副主席安子介外孫楊鼎立（Derek）代理，佢話多得一位新加坡老友介紹，一夜之間「點帶成金」。
雷射貼調節人體波頻
Grounded手帶冇賣廣告，Derek就做生招牌。卓妮早前一個星期二下晝行經中環，見Derek帶住條白色Grounded行街，原來佢代理條手帶只有四個幾月，目前係香港同南中國代理。呢條手帶喺名人二代圈子中熱爆，Derek都話好驚訝，但講到開設專門店，佢就話要諗吓先：「港人對潮物嘅熱情來得快，去得快；推得太急，產品死得更快。」
除咗喺朋友間推廣，Derek近日接到一個大客仔，就係香港高爾夫球會。佢話唔少球手覺得戴咗手帶打波，平衡力好咗，所以計劃將手帶推薦畀更多球會，又會考慮將手帶擺喺高級超市賣。
到底條手帶有乜秘密？Derek揭開真相。原來手帶內有個銀色雷射貼，由美國研發製造，據講含有多種波頻，戴上後有助調節人體波頻，令人感到身心平衡愉快，真係信不信由你！