中環耳目：李妮食蟹乸保生態平衡
歎大閘蟹嘅季節到咗壓軸嘅季尾，俗稱「九月圓臍十月尖」，依家最啱食因天冷少郁動而肉質肥美嘅蟹公。不過，博愛醫院總理李妮（Lily）為咗生態平衡，偏偏愛食蟹乸，盛讚自家有機飼養嘅陽澄湖蟹乸，膏香幼滑，美味冇得頂。
早前Lily喺私人飯堂富臨飯店開飯，特登帶埋自家大閘蟹來享受一番。Lily話，多數人揀食蟹公，因為蟹公嘅膏黃甘香軟滑，蟹乸就較硬身，佢惟有幫手食乸。
蟹季狂擦五十隻
咪以為Lily犧牲好大，查實佢老公有份投資嘅陽澄湖百年老店王四酒家，以有機飼養嘅大閘蟹零舍不同，蟹乸嘅蟹膏綿滑清香不膩，唔似市面有啲硬到好似擦膠。所以每次蟹季來臨，Lily代四方老友訂嘅大閘蟹就超過一千隻，自己都可以食四、五十隻㗎！
Lily仲教路，市面上真正嘅陽澄湖大閘蟹愈來愈少，出身陽澄湖嘅蟹身冇泥，事關陽澄湖底係石頭，無淤泥。大家不妨自己去搵真相。