未入正題之前，容許功夫茶同大家分享一則「八股文章」。一提到八股，必定聯想到老餅、官腔、空洞、封建以及現已廢除嘅科舉。
大家有冇諗過中國嘅科舉曾經係領先全球最文明嘅制度？當外國仲係一代傳一代貴族子弟壟斷所有重要職位嘅時候，中國已經識得透過科舉提拔人才，理得你係皇親國戚定係窮苦大眾，只要你飽讀詩書，再加上科舉及第，你就有資格平步青雲。呢家嘢叫做「社會階梯向上流動」，出身唔重要，最緊要實力。科舉後來出現種種流弊而被歷史淘汰，係另一個古仔嘞。
因乜解究要提到咸豐年代嘅科舉呢？即係咁，最合理嘅教育以至考試制度一定係容許「社會階梯向上流動」，本來香港有呢個優良傳統，可惜愈來愈變味。不少達官貴人，出身極之寒微，經過努力讀書之後終於出人頭地，屋邨仔變身官老爺大不乏人。既然傳統咁優良，係咪應該保存呀？可惡嘅係，教育局一手破壞優良傳統！
由於出生率下降，學生人數減少，教育局懶理要求順水推舟採用小班教學嘅呼聲，一意孤行殺校縮班。所謂縮班，係一刀切勒令所有中學由五班中一減少至四班。表面上人人平等，實際上蠻不講理。你知啦，十隻手指有長短，每間中學嘅水準都唔一樣，部分作育英才，部分誤人子弟，你唔理三七二十一將所有中學包括「傳統名校」五減一，即係懲罰水準一流嘅好學校啫，即係唔畀機會草根階層入讀名校啫，即係違背「社會階梯向上流動」嘅原則啫。
好多人對於教育局倒行逆施嘅做法滿腹牢騷，天文台前台長林超英係其中一個。超英哥哥喺佢嘅網誌發表文章，以英皇書院校友嘅身份公開表達不滿意見。
林超英係咁講嘅：「英皇書院作為一家『官校』，加上位於基層市民較多的西區，肩負着特殊和重要的社會任務，就是提供機會給基層家庭的子弟接受全面和優質的教育，扶助他們成長，讓他們以知識改變命運，為自己和家族改善生活，並且以所學回饋社會。」
筆鋒一轉，超英哥哥不留情面狠批：「最近幾年的學校直資化（和貴族化）令香港優質教育向中上階層家庭傾斜，令基層家庭子弟的人生輸在起跑線上，已經造成一種教育的不公義，現在再提出要求英皇書院（及其他歷史悠久的官中）每級五班減至四班，即是減少百分之二十，嚴重剝削最優秀的基層家庭學生得到最優秀學校教育的機會，是把教育的不公義推向更大的極端。」
嗱嗱嗱，連退休高官都睇唔過眼殺校縮班嘅官僚作風，你話教育局係幾咁與民為敵吖？
講真，功夫茶確係唔明教育局袞袞諸公到底諗緊乜，小班教學明明係提升教育質素嘅方法，學生人數減少又明明係採用小班教學嘅契機，更加可以避免教育工作者加入失業大軍，點解硬係唔肯從善如流呢？如果你話採用小班教學嘅經費太昂貴，功夫茶會同你講，放屁！特區政府乜都冇，就係錢多，無端端申辦亞運都幾百億啦，只要有心辦教育，一定唔怕缺經費。
唉，功夫茶有一個提議，不如由林超英帶頭率領英皇書院上街示威，怕且有機會改變教育官僚胡亂縮班嘅鐵石心腸啩！