政情：田北辰自爆少去大家樂
大家樂扣飯鐘錢一事曝光後，頓被千夫所指，自由黨中常委田北辰更喺電台節目上矢言要罷食大家樂，最後大家樂不得不投降，田二少又話要去大家樂連開三日餐表揚佢。唔知係咪怕畀人覺得佢只係吹水兼抽水，田二少尋日出席活動時，就自爆啱啱去完大家樂開餐，聲言自己「講得出做得到」喎。
田二少尋日去樹仁大學演講時遲咗些少，佢自爆遲到係因為要「履行承諾」，到大家樂食晏。佢大讚大家樂嘅叉雞飯物有所值，食食吓仲有個經理走埋去，拎部iPhone出嚟想同佢喺大家樂個牌匾前影相留念添。田二少話相信嗰位經理聽過佢嘅言論，先會想同佢合照，令佢更加覺得上星期講嘅嘢係值得喎。不過講講吓，佢不得不承認以前去大家樂，一年去唔到三次，即係好少幫襯，二少即係二少。
田二少靠「罷食論」爭曝光，可惜呢番言論就同佢黨友、飲食界立法會議員張宇人打對台。田二少承認該黨有工商背景，容易造成地區直選同功能組別議員對立局面，唯一辦法係將黨定喺中間位置，靠睇數據同分析做人喎。