政情：少數族申訴考起林D9
施政報告話要增加資源幫助少數族裔人士，但具體要幫啲乜嘢，班官員都仲未完全掌握。好似尋日政制及內地事務局局長林瑞麟（林D9）到訪少數族裔人士支援中心，即興入咗一間教緊電腦課程嘅課室，結果畀一位居港幾十年嘅印度裔伯伯考起。
事關嗰位伯伯見到林D9，即刻向林D9攔路申訴。原來伯伯居港幾十年，由於冇特區護照同回鄉證，返內地時揸嘅係過境簽證，但次次過關時都大排長龍，好唔方便。佢希望港府可以幫手縮短等待時間。林D9聽罷即刻有反應，叫助手記低件事。
林D9突然間變身「林青天」，一眾來自尼泊爾、巴基斯坦等五湖四海嘅少數族裔人士，都唔執輸提出意見。有人提議中心應開辦普通話課程，希望政府撥多啲資源支持。依家中心已開咗廣東話同電腦班，但少數族裔人士顯然睇得長遠過港府官員，覺得唔多夠。今時今日全球放眼中國，連少數族裔都知道要裝備好自己，北望神州，班高薪官員醒咗未？