中環出更：遺失神奇手帶張俊勇囉囉攣
社交圈興起一片Grounded膠手帶熱，城中名人二代幾乎人人有一條，連一向不愛戴首飾嘅中總青年委員會常委張俊勇（Thomas）都加入行列，戴上後頓覺心情愉快。不過近日Thomas條手帶不翼而飛，令佢心情囉囉攣。
有助增加平衡力
Thomas早前出席一個酒會，右手腕上多咗條白色膠帶，咪以為佢貪靚，原來條手帶妙用多，據講有助增加平衡力。Thomas笑言起初由朋友手上接過手帶，覺得半信半疑，即場做實驗來一招「金雞獨立」，果然冇咁易左搖右擺。朋友仲話佢知，戴上呢條膠手帶打高球，揮桿都會打得直啲、遠啲喎。
試戴三個幾月後，Thomas話感到身心平衡咗，心情舒暢，但始終唔知條手帶內裏有乜乾坤。最頭痛係，月前出差時，不慎遺失手帶，令佢若有所失。好彩條手帶只係三百幾元，唔肉赤，但手帶戴開有感情，Thomas話會盡快託朋友幫佢買番條。