政情：梁美芬泊大碼頭戰九西
工聯會早前強烈暗示，一二年立法會選舉未必再為九龍西梁美芬「抬轎」，令梁嘅選情添上變數。不過，建制派「票倉」唔止工聯會一個，九龍社團聯會喺九龍東、西就手握共十五萬票，據悉，梁美芬最近已經緊緊泊住呢個大碼頭，為未來兩年兩場直選搵定箍票靠山。
梁美芬喺深水埗區嘅第二個議員辦事處喺尋日開幕，除中聯辦官員同財經事務及庫務局副局長梁鳳儀畀面出席外，九龍社團聯會亦派副會長吳日章嚟撐場。被問到係咪已獲聯會力撐，梁美芬不置可否，只稱上星期隨聯會上京拜訪港澳辦之後，同聯會熟咗好多喎，又直認○八年九龍西參選一役，獲幾個社團幫忙，聯會係其中一個。
九龍社團聯會同工聯會一樣分屬中央嫡系組織，每次直選都為建制派默默發揮功能，聽政界人士講，梁美芬已得到聯會首肯力撐，早前更隨團北上，為明年區選同後年立法會選舉上京搵定靠山，打定個底。