政情：謝偉俊話飲酒似飲奶
由本港葡萄酒業界成立嘅「香港葡萄酒商會」，尋日正式成立，旅遊界立法會議員謝偉俊（Paul）出任義務法律顧問，佢謙稱自己唔識歎酒，人哋畀咩酒佢飲就飲咩酒。阿Paul仲好抵死話，飲酒就好似飲奶咁，阿媽畀咩奶佢飲就飲咩奶囉！
做葡萄酒會顧問
既然唔識歎酒，點解會做葡萄酒商會法律顧問呢？阿Paul話，佢同創會會長何耀康（Henry）唔相識，係佢哋搵上門，Paul覺得商會成立有助於促進香港旅遊業，都符合佢身為旅遊界議員嘅身份，所以好快就應承咗。
Henry話，香港撤銷葡萄酒關稅之後，本港葡萄酒產業已急速發展，估計後年本港入口餐酒市場可達至三百億元，佔亞洲整體入口餐酒市場嘅兩成四。由於市場潛力好大，所以佢去年底開始籌謀成立商會，尋日趁會展舉行香港國際美酒節盛事，正式宣布商會成立，齊齊為香港成為「亞洲葡萄酒中心」乾杯。