政情：陳維安替孫公受靶
呢幾日翻風，溫度都低咗幾度，搞到年紀有番咁上下嘅教育局局長孫明揚（孫公）都打敗仗，尋日孫公原本要去立法會教育事務委員會向議員解釋施政報告嘅教育措施，但佢因為身體抱恙臨時甩底，要由副局長陳維安頂上，點知就累到陳維安做咗箭靶，畀班議員輪流炮轟。
陳維安尋日以署理教育局局長嘅身份去立法會解說，原本諗住今年教育方面無咩特別政策好易過骨，點知班議員咬住新增嘅國民教育課程唔放，張文光、李卓人等輪流發炮，又話個政策事前無諮詢，又話原本嘅公民教育變國民教育，公民教育係咪唔使理，又擔心要學生考試嘅國民教育同《基本法》課程，只係想幫班學生洗腦，相反一啲敏感議題就唔會講。
陳維安原本都逐一解答問題，諗住見招拆招，但愈答就愈似背書，答晒啲官方答案，來來去去都係嗰幾句，搞到班議員好唔順氣，火都嚟埋，仲鬧佢答非所問講嘢一舊舊，真係無陰功。如果比孫公喺度坐鎮，一定會四両撥千斤，化解議員嘅戾氣，睇嚟陳維安要跟孫公再學吓嘢先得喇。