中環出更：盧永仁考第一靠茅招
尋日英國知名嘅肯特（Kent）大學喺香港舉行活動，高錕慈善基金董事盧永仁（William）以校友身份出席。William出晒名讀書叻，佢喺短短七年之內攞到四個學位，包括學士、碩士同埋博士，又經常喺學校名列前茅。但William尋日講笑話，佢考第一係靠出茅招得番嚟嘅！
令同學無心機溫書！
點解咁講呢？William話，佢喺香港讀中學時好鍾意打籃球、踢波，去到英國肯特大學讀書之後，由於身形關係唔夠啲外國人打，所以索性成日讀書，通常考試前一個星期就溫晒書，於是就去撩同學仔玩，搞到人哋無心機溫書，咁佢咪考第一囉！
William話，佢依家一半時間幫內地老闆上堂，教佢哋如何管理公司，另一半時間就做慈善，即係上個月啱啱成立嘅高錕慈善基金。對於政府成立「關愛基金」，William都話摸不着頭腦，但係始終個基金冇太多資料，佢都唔想講太多。