中環出更：名人「帽」出色 馬場鬥一番

雷禮權攞頭獎

William出名搞鬼，為炮製獨一無二嘅禮帽，佢出門前花十分鐘，以銻金屬左屈右屈整成一頂帽，William覺得外形似足一部「金鐵馬」，但金色未有為佢帶來財氣，尋日場場落注，結果場場輸，夾埋唔見幾千元。好彩頂帽幫佢贏番唔少分，攞咗個最佳頭飾獎，算係攞番個安慰獎嘞。

同場有唔少勁敵，行政會議成員梁智鴻太太舊年係最佳服飾獎得主，尋日以一頂購自英國嘅華麗禮帽示人，擺明有備而來。現場靚女滿場飛，卓妮問梁太怕唔怕老公梁醫生女?梁太信心十足話：「佢（老公）專注社會事務，連我都睇唔到，又邊有時間女呢。」真係識講笑。

其他名媛亦各出奇謀，健康快車創會主席方黃吉雯將一頂Gucci旅行帽改裝，喺帽上加上Bling Bling腰belt，就變身一頂閃爆全場嘅禮帽。呢身打扮果然當旺，佢老友隻愛駒「錢照贏」勝出頭馬，小吉興奮到揮手喝采。富豪集團太子女羅寶文（Poman）就以藍外套及桃紅色裙，呢身打扮原來出自羅媽媽手筆，Poman自爆懶得行街shopping，買衫全由媽咪打點。

恒生銀行副董事長兼行政總裁梁高美懿（Margaret）都嚟湊熱鬧，佢入場後用幾千元買咗頂紅黑帽，即買即戴，心情即時靚晒。一眾名人為帽瘋狂，名媛林李婉冰就冇加入戴帽一族，以一身Chanel Look進場。講起近況，林太話二仔明年三月去日本讀設計，呢排日本掀起反華情緒，佢都好擔心，希望事件幾個月後可以平息喎。

梁智鴻太太（左）戴咗頂購自英國嘅黑白禮帽，與老公拍拖入場。	立法會議員張宇人（左三）與兒子（左二）幫老友手拉頭馬。 （溫國佳攝）	方黃吉雯花心思改裝Gucci帽，創意十足。

卓妮