政情：戴德豐「三寶」起家
港人嗜吃零食，睇中商機，賣零食都會發達。人稱「零食天王」嘅四洲集團主席戴德豐就係最佳例子。佢有個外號叫「卡樂Ｂ之父」，原來佢第一桶金，唔係靠賣卡樂Ｂ發達，而係百力滋、太空糖同三粒糖至真。
戴德豐做咗全國政協常委後，近年活躍於內地政壇，佢早前喺十‧一酒會現身，零食天王笑言家族生意已交晒畀太太胡美蓉同子女打理，自己專注做公職。佢讚囡囡戴凱欣有諗頭，揸Fit做市場推廣，將零食王國搞得有聲有色，令佢好放心。
戴德豐零食生意做得咁成功，全靠當年夠眼光，諗番起嚟，佢自爆第一桶金係靠零食三寶，即係百力滋、太空糖同三粒糖，之後至愈賣愈多種類，終於搞咗個零食王國。時下細蚊仔可能對太空糖、三粒糖有啲陌生，但對於中年人嚟講，就係陪伴成長嘅童年回憶，依家已經成為香港嘅懷舊文物啦。
戴太咁幫得手，佢早前同我哋講，自己只揀健康嘅零食，最鍾意紫菜同梳打餅。