投訴：領匯蠱惑車場變相加租
領匯「吸金」招式層出不窮，停車場租戶慘成開刀對象！繼停車場加租之後，領匯將於十月起推行新制度，要求車主每年支付一百五十元年費、改用新紅外線遙控入閘，被指變相加租。以領匯旗下共有八萬個停車位計算，新措施料可每年帶來一千二百萬元收入。立法會議員狠批「飛擒大咬」的同時，關注團體亦怒斥領匯巧立名目、變相加價，正計劃發起抗議行動表達不滿。
「早排先加完租，依家又話遙控器要交年費，咁咪即係每個月加多十幾蚊租？」領匯停車場租戶劉先生對實施入閘遙控器新收費措施大感錯愕，認為有變相加租成分。根據現有安排，領匯車場租戶使用入閘遙控器須繳交按金五十元，至退租交還時可獲退回。不過，由十月起改用的新式遙控器，則需每年繳交一百五十元年費。
設施差 反要車主付款
劉先生質疑新安排有巧立名目、變相加價之嫌，「點解新遙控要交年費，又冇得退番，收多咗啲錢去咗邊？如果用嚟請個職員開閘都合理啲！」劉要求領匯就新安排作合理交代。
領匯發言人表示，新款遙控器可在車內控制閘桿開關，車主入閘時可免受天氣影響，但強調年費並非硬性收費，車主可按自己需要，自行選擇使用免費智能卡或舊有之遙控器。至於選擇新式遙控器的租戶，則需繳交一百五十元年費。發言人又稱，在現有四萬多個租戶中，只有約四分之一使用遙控器。
領匯的解釋令劉先生更為光火，「咁即係擺明你唔想畀雨撇就要自己畀錢，乜領匯唔係要自己搞好啲設施先租畀人咩？」劉直斥領匯本末倒置，強迫要求改善服務的車主自行付鈔。
議員斥領匯飛擒大咬
事實上，過去本報亦接獲不少讀者投訴，指領匯停車場入口不設上蓋，尤其令大雨期間入閘者狼狽不堪。但領匯卻一直以涉及複雜技術及業權問題為由，未就加設上蓋建議作正面回應。
立法會交通事務委員會委員王國興形容領匯「飛擒大咬」，藉推出新遙控間接調高停車場收費，「用咗就唔驚開窗撇雨？起咗上蓋都可以擋雨啦，分明就係將起上蓋嘅責任轉嫁畀車主！」
黃大仙區議員陶君行則質疑遙控器年費過高，擔心新措施只是加價序幕，「今次按金變年費只係小動作，如果第日話唔用（新遙控）唔得嗰陣，咁咪人人每年都要畀多百五蚊？」陶直指領匯此舉屬變相加價，正計劃聯同領匯監察組織車主發起抗議行動，要求領匯撤回年費政策。
記者 梁卓怡