弊弊弊！慘慘慘！香港買樓難難難！
雖然尋日有一幅柴灣地皮拍賣流產，不過樓宇價格繼續升完再升。早前就話豪宅先至升到得人驚啫，原來家陣連普通私人樓甚至居屋都升到離晒大譜。好似慈雲山居屋慈愛苑咁吖，剛剛有人喺第二市場以一百九十五萬元成功沽出。呢個價錢有乜嘢含意？含意嚇死你咯，比起九七年購入價高出超過五成呀，老友！
眾所周知，九七年係樓市高峰期，堪稱香港開埠以來「史上癲價」。喂，居屋咋噃，今時今日竟然貴過九七高峰期五成以上，你話蝸居一族點頂吖？升斗市民有乜辦法置業？
樓價實在太癲太喪，普羅大眾無法負擔，所以社會各界不斷有人要求政府復建居屋。而事實上，曾蔭權早於今年五月宣布諮詢公眾對政府資助市民自置居所嘅睇法，然後喺下月施政報告交代。諮詢有結果未呢，請問？運輸及房屋局局長鄭汝樺係咁講嘅：「主流意見係希望政府協助市民置業，但反對聲音絕對不少，而且比較肉緊，好多人經歷過九七年痛苦經驗，變成負資產，苦口婆心提醒我哋，上錯車好痛苦，政府不要鼓吹人上車。」
哦，明白，主流意見係就係希望政府協助市民置業，不過官字兩個口，早就預設立場，唔想復建居屋，所以佔少數嘅反對聲音就要非常尊重。遊戲規則通常係，少數服從多數，一去到鄭局長口中就變成，多數尊重少數。
呢嗱嗱嗱，呢啲大概就係「八萬五恐懼症」。當初老懵董推出八萬五政策累人累物吖嘛，害到成個樓市砰砰嘭嘭冧到滿目瘡痍，家陣咪見過鬼怕黑囉，任何疑似干預市場嘅行為都畏首畏尾。
難怪立法會房屋事務委員會主席王國興對於鄭汝樺嘅講法非常不滿，佢批評：「所謂反對意見係來自小部分地產商，主流意見係每年復建三千至五千個居屋單位，呢個係立法會不同黨派共識，得到諮詢結果印證，政府不應推搪，反過來擴大反對聲音。」冇錯嘞，諮詢係假嘅，推搪至係真。
計功夫茶話齋，叫你復建少少居屋啫，例如三幾千個單位，又唔係叫你重蹈覆轍年年推出八萬五千個單位頂爛市，使唔使驚到手騰腳震？
話時話，政府協助市民置業可以有好多種辦法，復建居屋係一種，置業貸款係一種，先租後買又係另一種。如果你問功夫茶，功夫茶會極力反對置業貸款，皆因呢個係糊塗笨策，絕對講唔上優良房策。
置業貸款有幾笨？首先，置業人士忽然之間欠下一屁股債；其次，政府借錢畀市民買樓，等於火上澆油令到樓市更加瘋狂；再者，萬一Touch Wood講句，樓市唔知點解止升回跌硬着陸，到時成街都係負資產，咁就真係闔家慘慘慘！
總而言之一句講晒，市民置業係要協助嘅，但係切忌好心做壞事，最怕你房策變笨策，咁就一殼眼淚咯！