政情：邪神周澄笑住煮兩味
美女廚房入侵政界？「大專2012」周澄尋日以一個火雲邪神造型為一個電視節目錄影。不過佢一開始就忍唔到笑，被其他嘉賓搞到講唔到嘢，後來佢同拍檔煮咗發財雙仁勁煀鯉以及溫水煮蛙扣豬脷兩味餸，其實想暗寸特區政府解決市民置業問題不力同埋打壓香港電台。
周澄尋日錄影，佢話兩味餸嘅餸名都係電台方面設計，臨場對白就係靠爆肚。佢煮嘅「勁煀鯉」有A貨錦鯉、髮菜、蠔油同埋生油，寓意係寸特區政府搞唔掂樓市，抽水抽得勁嘅發展商發晒；第二味「扣豬脷」就諷刺港府處理港台問題溫水煮蛙，影響港台言論自由。
不過做評判嘅全國政協委員劉夢熊就無食到兩味餸啦，佢點評時話港府固然要改善分配不公，但都唔應該搞針對，所以一般。
至於第二味，佢話直頭過晒火位，事關傳媒可以報道「五區公投」，足證溫水煮蛙之說唔合格。