政情：東隧加價行會攔路虎

東隧加價，背後涉及同政府暗中過招。港府原計劃快將公布三隧分流報告建議，打算調高紅隧私家車收費，再將多收嘅款項資助東隧減價，吸引駕駛者改行東隧過海，點知東隧先發制人，搶先申請加價，殺政府一個措手不及。公共交通加價係民生大事，亦隨時演變成政治炸彈，政府在明奈東隧唔何，但係在暗一樣可以同東隧玩番鋪，就係由行會非官守成員出手否決加價。

一招靠嚇 恐拖三四年

一名不願具名嘅行會成員向我哋明言，東隧加價四成，幅度驚人，完全唔可以接受，佢喺行會一定提出反對，奉勸東隧趁行會尚未審批加價申請，事件仍有轉圜餘地，研究降低加幅咁話。呢位行會成員仲話，行會否決加價申請後，咪等東隧去搵獨立仲裁人解決囉，分分鐘一拖三、四年，對東隧亦無好處。

翻查紀錄，東隧過往曾先後兩次加價遇阻，最後都訴諸仲裁，第一次喺九七年，第二次喺○二年，兩次都勝訴獲批准加價，但○二年嗰次一搞就用咗三年時間，到○五年獲准加價近七成。食髓知味，今次東隧瘋狂加價四成，亦預先揚言，加價申請若遭否決，便準備第三次仲裁，希望拋窒政府。

不過，東隧靠嚇似乎未能奏效，有份對東隧加價把關嘅行會成員打晒開口牌話會否決申請，相信這並非單純個人意見咁簡單，事關政府弱勢，若然輕易通過東隧瘋狂加價，任由市民肉隨砧板上，隨時要賠上政治代價。喺咁嘅情況下，東隧加價喺行會勢必路障重重，有關申請睇嚟凍過水。