中環耳目：大輝高要求偏愛燉萬壽果
好多成功商界名人都有個相同感受，就係後生時為事業打拚，同客人食飯傾生意都食得唔自在；如今面對珍饈百味，食得安樂好多。做廠出身嘅立法會議員林大輝都有呢種感受，佢話以前傾生意只會諗個客食乜，但現在就輪到自己享受吓，好似佢去到經常幫襯嘅尖沙咀凱悅酒店中菜「凱悅軒」，例必歎番自己心愛嘅美食。
大輝以前幫半島針織打江山時，經常到舊凱悅軒打躉，同主廚盧貴溪相識多年，佢最欣賞係盧師傅嘅「四寶燉萬壽果」，呢味菜式類似燉冬瓜盅，但唔用冬瓜，改用夏威夷木瓜，食起來分外鮮甜，好味指數爆燈。大輝仲推介冰鎮鹵水九孔鮑魚、金蒜銀絲蒸蟹鉗、脆皮龍崗雞、糖心雪花皮蛋酸薑、雜菌素粉果及「六小碟」等。
擺得唔靚 直言不諱
大輝平時飲食好隨意，經常同波友去茶餐廳開餐，但食好嘢時都有啲要求，好似佢推介嘅「荷葉金蒜銀絲蒸蟹鉗」，當發現同上次食開嘅唔同時，就問師傅點解蟹鉗墊底嘅唔係糯米，見到碟「糖心雪花皮蛋酸薑」時，又覺得啲糖心雪花皮蛋擺得唔靚，果然識飲識食識享受。
