中環出更：金刀梁林健鋒食晏識女仔
百年男校聖若瑟書院首位女校長陳美梅尋日首度公開露面，多位名人校友重返校園撐場，包括行政會議成員梁智鴻（金刀梁）、立法會議員林健鋒（Jeffrey）及前議員何承天，三人大談以前嘅校園趣事。金刀梁同Jeffrey都記起以前好鍾意到兵頭花園附近食晏，但醉翁之意不在酒，其實去識女仔至真，事關嗰度有好多鄰近學校嘅女生。
何承天嘅記憶中，兵頭花園仲經常有同學打交，有次同學打交，就畀一位識打拳嘅學校修士見到，修士於是勒令兩位同學返學校以打拳方式對打分勝負。金刀梁都話自己好百厭，慣常叫啲修士做「和尚」喎！不過，大家自誇當年都係「讀得又玩得」，課餘好玩得，上課又專心聽書，事關老師有「貓頭鷹」綽號，眼神相當凌厲，大家只好乖乖就範。
阿Ron最怕人叫書友
聖若瑟名人校友仲有好多，行會成員夏佳理（Ron）和立法會議員石禮謙都係舊生，經常有聚會。Jeffrey記得有次大家去馬會會所敍舊，佢一見當時為馬會主席嘅阿Ron就叫咗聲「書友」，阿Ron聽到即黑臉，話喺馬會叫「書（輸）友」唔老利，好彩金刀梁在場解圍，建議大家統一互叫「學友」啦！
卓妮