中環出更：Tim霍Prada尋「簿」中空寶
已故全國政協副主席霍英東長子霍震霆（Tim）着衫一向鍾情意國名牌Prada，平日愛穿Prada優閒褲，仲戴埋同牌子嘅帽；佢嘅二公子霍啟山就愛着Prada波鞋，一家都係Prada迷。近排秋冬新裝上場，佢一於出動睇吓有咩新貨，但Tim霍係城中大忙人，一邊睇衫一邊不停講手提電話，一心二用，認真本事。
傾住電話 一心二用
上星期五下晝五點，卓妮撞見Tim霍獨自行中環歷山大廈嘅Prada。戴上黑超嘅Tim霍，喺售賣男裝鞋同皮包嘅專櫃前徘徊，店員醒目地上前招呼，不過Tim霍手上有個重要電話傾緊，令佢無法專心睇衫，最後快速逛咗五分鐘，乜都無買就走人。
離開Prada店後，Tim霍行去置地，行緊路依然繼續講唔停，期間遇上一位外籍朋友，先至收線同對方寒暄幾句，之後行出置地大門，急步穿過車群，衝過對面馬路，身手相當敏捷。
卓妮事後打電話問Tim霍，到底行Prada想買乜？佢笑騎騎話：「你都見啦！我得個『睇』字，兩手空空。」不過佢都靜雞雞話畀卓妮知，當日其實一心想買Prada新出嘅記事簿，點知仲未返貨。Tim霍品味高，連記事簿都揀Prada出品，難怪外傳佢係Prada嘅「VVIP」，即係超級貴賓。不過佢急忙澄清話：「VVIP？梗係唔係啦，我邊有咁巴閉。」
講番Prada記事簿，店員透露係最新產品，簿皮以牛皮製造，夠晒耐用，每本大約二千港元，但有心買嘅人要再等一會，事關本簿太搶手，暫時缺貨喎。
卓妮