政情：高錕插褲袋扮型仔雕像
中大前校長「光纖之父」高錕榮獲諾貝爾獎揚威全球，中大早前專誠邀請中國雕塑院院長吳為山，為高錕製作一個「左手插袋」嘅「型仔」雕像。高錕尋日同太太一齊出席雕像揭幕典禮時，仲左手插袋扮番雕像中嘅自己，非常鬼馬。尋日嘅高錕，仲一改以往清爽外形，留咗一臉長長嘅白鬍鬚，吳為山大讚佢充滿文化藝術家氣息。
不時微笑 狀甚滿意
高錕雕像造型自然簡單，雕像身穿西裝西褲、雙腳微微分開企，面露微笑，加上雕像左手插褲袋，盡顯高錕「型仔」嘅一面，完全啱晒高太黃美芸要個雕像「型仔」同自然嘅要求。高錕顯然都好滿意銅像，不時望住雕像微笑，同一眾嘉賓、雕像合照時，仲同雕像中嘅佢一齊「插袋」擺甫士合照。
高太喺典禮代表高錕致詞，話好榮幸高錕雕像可以喺校園畀每一代學生得悉佢嘅事迹。吳為山致詞時就坦言高錕嘅神韻好難掌握，佢話多年前被高錕慈愛嘅微笑深深影響，所以雕像都希望透過笑容表現高錕對世界嘅仁愛之心。中大校長沈祖堯儀式結束前，仲送咗一張雕像照片畀高錕留念。