世事無奇不有，連疾病都似乎有「七年之癢」。呢，可引致內出血休克嘅登革熱，「潛伏」七年後近排殺返轉頭，衞生防疫再響警報。
本港自○二及○三年之後，最近再次爆發本地登革熱感染個案，患者係一名住喺深水灣豪宅嘅外籍男子，近期並冇外遊紀錄，佢兩名兒子亦懷疑中招發燒。睇嚟，個案只係冰山一角。
內出血休克可以致命，咪話唔得人驚。如果唔及時控制，登革熱病毒可能迅速擴散，隨時出現大爆發。呢嗱，衞生署衞生防護中心尋晚又公布一宗懷疑本地登革熱個案，患病嘅兩歲女童與已確診感染登革熱嘅男子係鄰居。
登革熱病毒透過蚊傳播，呢次好明顯係滅蚊出問題。原來患者住所一帶連誘蚊產卵器都冇，證明當局對白紋伊蚊監察不足，防蚊處處甩漏。
食環署事後派人喺患者寓所五百米範圍內滅蚊，但關注團體尋日喺附近短時間內捉咗至少二十隻蚊，其中兩隻疑似白紋伊蚊，仲踢爆附近地盤除咗有唔少積水，雜草叢生，更有食環署棄置嘅多個發霉垃圾桶。關注團體最近兩三個月收到幾十宗蚊患投訴，近半喺南區。
亡羊補牢，未為晚也。登革熱攻破城池，如果當局即刻堵塞漏洞，加強防範，完全可以阻止大爆發。弊在港府官僚從來唔認真看待疫情，永遠優哉游哉做太平官。
正如港大感染及傳染病中心總監何栢良話齋，再爆本地登革熱個案，反映監察系統有盲點，令人質疑「控蚊措施係咪差咗」。
查實，控蚊甩漏嘅唔止深水灣，就算裝咗誘蚊產卵器，都不過得個睇字，甚至畀人上下其手，弄虛作假。呢，房屋署○四年起喺一百三十幾個公共屋邨，分批設置二百四十幾部石油氣誘捕蚊機。今年初夏白紋伊蚊活躍季節，本報記者發現唔少捕蚊機冇啟動，變成係公園同山邊嘅「道具」，有啲機器壞咗冇人理，就算開得，誘蚊貼長期唔換，等於自廢武功。
講開滅蚊，仲有個「廿蚊一分鐘」古仔，可惜講嘅係蚊隻數字，如果係最低工資就發達咯。嗱，本報記者幾個月前跟香港捉蚊協會人員去流浮山一帶，短短一分鐘內捉咗二十隻蚊！呢啲咪就係港府滅蚊嘅「政績」囉。
家陣香港嘅環境真係愈睇愈反胃，當局防蚊唔掂，滅鼠同樣醜聞多多，鬧市變埋老鼠天堂。呢，銅鑼灣一間泰國菜館，前晚就上演一齣「老鼠贈興賀中秋」鬧劇，有隻逾呎長嘅老鼠沿裝飾鋼管爬來爬去，食客嚇到走夾唔抖。
滅鼠無方，滅蚊甩漏，當局不以為然，繼續敷衍。衞生署署長林秉恩話喎，登革熱仲未喺本港扎根，情況並唔係「世界末日」，唔使過分擔心。計功夫茶話齋，一兩單登革熱個案的確唔算「世界末日」，但防疫戰線形同虛設，沙士悲劇隨時重演，香港遲早玩完。