政情：范國威黨內前途暗淡
每年舉辦七‧一遊行嘅民陣早前改選，民主黨西貢區議員范國威（Gary）以個人名義競逐召集人，以過半數支持撼贏做過幾屆嘅鍾松輝，十足羽翼已成嘅樣子，但實情可能係危機殺到，再唔自保就從此玩完！
我哋早前分析過，民主黨打算二○一二年立法會選舉喺新東用「Ｎ＋２」策略，力爭四席，理論區內嘅第二梯隊會多咗機會發圍，不過Gary統統冇份。何解？冰封三尺，非一日之寒，身為改革派嘅Gary，同該黨當區立法會議員黃成智呢啲主流派嘅中堅分子實在冇乜偈傾，要埋堆簡直係天方夜譚，而副主席劉慧卿之前喺前綫亦帶咗唔少人過檔，個個都等緊機會上位，有排都未輪到Gary。加上Gary有一排曾經想「洗底」同改革派保持距離，最終又不了了之，已經令佢夾咗喺改革派同主流派中間，裏外不是人，要得到各個地區樁腳支持出選新東就難上加難。
我哋呢幾日一直都聯絡唔到Gary，但佢就曾經話過只係關注政府重推廿三條立法先做民陣召集人，係咪真係咁單純，真係得佢自己一個至知嘞！