政情：林D9陪太太米蘭Shopping
政制及內地事務局局長林瑞麟（林D9）前幾日喺「全球華僑華人促進中國和平統一大會」活動上同太太一齊現身，佢透露，活動之後即晚會飛去歐洲度假，而且仲去成兩個星期、一共三個國家。咁即係政改本地立法條例草案最少要兩星期之後，至提交行政會議討論喇。
林D9今次趁立法會十月中復會前，同太太到土耳其、希臘同意大利旅遊，佢話除咗意大利之外，另外兩個國家之前都未去過。林D9兩公婆今次去嘅三個國家都比較接近地中海，除咗氣候宜人外，氣氛仲相當浪漫，林D9就話自己想去土耳其同希臘呢兩個歷史文化深厚嘅國家睇古蹟，感受當地風土人情。
至於意大利，大家都知呢個國家係名牌集中地，既然一去再去，好明顯就係去「血拼」啦，仲話到明會去米蘭添，問到佢係唔係要陪太座購物先至再去意大利，林D9冇直接回應，只係講咗句：「你真係聰明！」