政情：葉劉戲曲之旅收穫豐富
匯賢智庫立法會議員葉劉淑儀早排去咗內地旅行十日，早幾日先啱啱返到香港。葉太今次去咗三個地方，包括北京、蘇州同無錫，今次旅程收穫豐富，除咗喺北京睇到佢十分喜歡嘅京劇同越劇之外，喺蘇州仲欣賞到平彈同崑曲，可以講係一次崑曲之旅。
葉太一向都鍾意中國戲曲，去到北京當然唔會錯過著名嘅京劇啦，佢今次就去咗北京嘅長安大劇院欣賞越劇《半把剪刀》同埋京劇《坐宮》。佢話兩套劇嘅演員都演得好好，其中《坐宮》更加係由年輕嘅京劇演員演出添。葉太話，此行無機會欣賞到國家級京劇演員嘅演出，因為嗰啲「大角兒」（大牌演員）要喺中秋呢啲大時大節先會演出。
葉太喺蘇州嘅蘇州工業園區月光碼頭月光書院裏面亦欣賞到名聞遐邇嘅平彈同崑曲，呢間月光書院係個新建嘅場地，今次得到一名蘇州朋友嘅帶路先至識去，第時有機會會再去多次喎。