噢——賣——葛！特區政府話要再一次申辦亞運，原來係認真o架！
吖，未入正題之前功夫茶同大家分享一則小趣聞，大家知唔知道香港開埠初期係明文禁止通街賣葛o架？事關當時洋人當權，一聽到小販大叫「賣葛賣葛」，一來音近「My God」，二來類似「賣God」，前者大吉利是，後者實屬褻瀆，上帝當然係唔可以當一碌葛咁賣出去啦。所以咯喎，賣葛係禁止嘅，證明以言入罪唔係中國人獨有，洋人都鍾意玩呢家嘢。
好嘞，言歸正傳，講番亞運。因乜事幹香港要主辦亞運呢？官方答案梗係為咗提升香港嘅國際形象啦。民政事務局局長曾德成仲話，今次係不容錯過嘅合適機會，有助培育精英運動員、鼓勵體育文化以及推動本港作為體育盛事之都，又可以加強市民對香港嘅自豪感同自信心。至於實際原因，人人心知肚明，四個字講完：貪慕虛榮。
呢嗱，講真，如果最近唔係咁流行「仇富情意結」，功夫茶都唔會太反對你去貪慕虛榮，畢竟塗脂抹粉為自己臉上貼金係人之常情。就好似一個中年富太，臨出街之前梗係要為自己韶華老去嘅一張黃臉進行大規模批蕩o架啦，話唔定晨早已經飛咗去外國享受「隆胸之旅」咯。
問題係，香港無疑係好有錢，可惜一樣擁有大量窮人，數目超過一百萬，而窮苦大眾愈來愈仇恨富商以及富商背後嘅高官。喺呢個情況之下你仲去大灑金錢申辦歌舞昇平嘅亞運，係唔係有少少政治不正確呀？
係呀，真係大灑金錢o架。申辦亞運專責小組組長陳育德話喎，申辦二○二三年亞運嘅直接開支粗略估計介乎一百三十七至一百四十五億，主要係組織運動會所需人手開支以及提升現有設施，另外約三百億主要用於啟德大型綜合體育設施以及興建其他場館。換言之，亞運總經費超過四百億。
大佬，大拿拿四百億喎，假如你攞去扶貧，不知幾多人受惠啦。記唔記得自由黨前主席田北俊講過乜呀？田少話呀，特區政府係孤寒成性守財奴，取之於商而冇用之於民，害到年年貢獻巨額稅款嘅商家食死貓。
姑勿論田少係咪為商家文過飾非，鐵一般嘅事實就係，特區政府名副其實孤寒成性，扶貧工作做到不倫不類。就以最近一單官司為例吖，有一位躉船工人遇到意外，必須切除右小腿，講得難聽啲即係跛腳，社會福利署居然以「並非百分百失去工作能力」為由拒絕發放傷殘津貼。你話吖，呢啲係咪冷血嘅守財奴行為？
大家可能會話，扶貧還扶貧，亞運還亞運，唔應該混為一談，因為政府可以一方面貪慕虛榮，一方面紓解民困。即使係咁，仲有一個問題值得大家深入探討。政府建議興建有三千個單位嘅亞運選手村，正考慮由地產發展商或者公營機構建造及營運，亞運結束之後將會出售畀市民。
問題就係，亞運選手村會唔會成為另一個官商勾結嘅地產項目呀？你知啦，類似情況發生過好多次o架嘞，餐餐都搞到怨聲載道。
總而言之，扶貧扶到眼眅眅，窮人餓到要作反，申辦亞運勿亂玩，小心再次撞大板！