由前民政事務局局長何志平做籌備委員會主席嘅香港客家文化節，將會喺今年十二月二日至五日舉行。鄉議局都係呢次活動嘅籌委會成員之一，尋日鄉議局舉行執委會會議，度吓搞咩活動好，結果建議舉辦炆豬肉比賽，有得玩又有得食，今回一定可以發揚客家文化！
肥平為咗隆重其事，前排仲親自拜訪鄉議局，介紹呢次客家文化節嘅特色，此外佢又出咗封信畀鄉議局搵贊助，講明捐夠三十萬就成為金鑽級贊助合辦機構、十萬就係翡翠級、五萬都有個白金級。
身為籌委會成員嘅鄉議局尋日提出，喺十二月四日舉辦一個炆豬肉比賽，邀請十間食肆或者酒樓參加，然後由食家做評判，最後贏到嘅食肆就獲贈證書一張，以作表揚。鄉議局呢條橋真係唔錯，事關搞飲食比賽一定不乏捧場客，炆豬肉係客家名菜之一，如果到時平民百姓都可以有份試食就好嘞！
