政情：官「民」聯手 踢垮梁君彥
抖暑兩個月，立法會今個星期正式開鑼，雖然仲未開始有大會，但個別委員會已經重新運作，立法會內各黨派嘅角力亦慢慢浮現。嚟緊除咗要處理政改本地立法，立法會仲要傾全城關注嘅最低工資水平同公平競爭法嘅細節。之前有消息指經濟動力梁君彥（Andrew）對競爭法條例草案委員會主席一職甚有興趣，因為競爭法對工商界影響深遠，為咗箍票點都要喺入面揸旗反映商界利益，不過泛民就話之你，公民黨有議員已經擺明車馬想同Andrew一較高下。但我哋就八到，民建聯都有意參一腳，令呢場「主席之爭」愈演愈烈。
驚畀人插官商勾結
據聞Andrew想做主席嘅消息一曝光，民建聯已經打開口牌話有興趣。建制中人指出，依家社會上仇商情緒蔓延，市民都對競爭法抱有期望，希望打破大商家壟斷局面，港府唔想由工商界出身嘅經濟動力處理競爭法，以免橫生枝節，畀個機會反對派喪插官商勾結，先開聲叫民建聯認頭。另一個原因，就同競爭法擔大旗嘅商務及經濟發展局副局長蘇錦樑有關。係人都知蘇錦樑係民建聯成員，做官以嚟都冇乜作為，民建聯在公在私都想幫佢一把。
最終邊個鍊得贏呢？好睇一定冇得做主席嘅泛民會支持邊個。有泛民成員透露，要佢哋撐一個工商界背景嘅人做主席就一定冇可能，建制派議員亦唔係個個都肯撐。好似民建聯嘅陳鑑林咁，曾經公開反對過就競爭法立法，有泛民中人寧願搵個形象比較中立嘅議員好過。知情者仲話，民主黨李華明提議搵五散人嘅會計界議員陳茂波（Paul）做主席，唔少泛民成員都支持，不過我哋搵過阿Paul，佢話一定會入草案委員會，不過嚟緊已經安排咗好多工作，對主席一職冇乜興趣。
依家主席之爭好似陷入膠着狀態，唔知點收科，民建聯就放風話，都唔一定要自己做主席，如果係其他中立議員做都肯讓步。不過依家嘅幾個人選似乎都唔係好啱要求，可能要等遲啲殺出第四個人選，件事先有機會明朗化嘞！