中環耳目：蛋撻王至愛「正斗」油器粥品
香港人鍾意食蛋撻，有香港第一Q嘜蛋撻之稱嘅蛋撻王因此愈做愈旺，每日最高可賣出三萬個蛋撻。卓妮早前見到蛋撻王控股董事總經理莊裕坤（Jerry），問佢除咗蛋撻之外至愛食咩嘢，佢直言好鍾意正斗粥麵專家嘅皮蛋牛肉粥同埋炸兩，原因係咩？製造認真囉！
投放資源 保持水準
佢話正斗嘅食物價錢雖然唔平，但價錢唔係問題，最緊要係次次都交出水準。蛋撻王依家喺香港有二十一間分店，仲殺入新加坡同馬來西亞，Jerry最關心如何保持食物嘅水準，所以佢哋投入好多資源。佢好幽默咁話，冇計啦！好似搵隻貓睇住隻老鼠，然後搵隻狗睇住隻貓，再搵隻老虎睇實隻狗……總之食物質素一定要控制得好。
蛋撻王係Jerry父親喺十七年前成立，初期喺工廠區賣飯盒同埋蛋撻等包點，但要喺工業區生存唔易，後來Jerry意識到制度化經營嘅重要性，於是開始不停設立目標，攞咗一個又一個嘅認證同埋資歷，終於獲得社會廣泛認同，從此慢慢走入商場同埋市區，發展成依家高峰時每日賣出三萬個蛋撻嘅王國。