中環出更：醫局CEO兩大熱密會歎潮菜
醫管局新任CEO遴選，進入叫胡階段。盛傳最後兩強係「梁張之爭」，即係醫管局質素及安全總監梁栢賢同醫管局聯網服務總監張偉麟拗手瓜。戰況咁激烈，理論上邊個都唔會打讓賽。不過世事難料，原來梁栢賢私底下同張偉麟好老友，尋日中午相約去九龍城食潮州菜，全程有講有笑，完全唔似競爭對手，唔通呢招就係「知己知彼，百戰百勝」？
梁張密會，畀卓妮撞到正，兩人中午一點相約喺九龍城汕頭澄海老四食晏，同枱食飯仲有兩位仁兄，就係社會福利署署長聶德權同醫管局策略發展總監羅思偉醫生。四個大男人圍埋咁好傾，唔通係密斟競逐CEO策略？定係提前同梁栢賢慶祝？梁栢賢好口密，笑言係「regular lunch」（例行午宴），定期會約老友食飯敍舊喎。眾所周知，梁栢賢係醫管局主席胡定旭頭馬，坐硬CEO個位，梁栢賢不置可否，報以微笑，似乎唔想多講。
世事真巧合，前醫管局公共專業事務及人力資源總監高永文都約咗朋友嚟澄海老四食晏，重遇四位老朋友好興奮，上前打招呼兼推介潮州美食。講開至知，原來身為骨科名醫嘅高永文，同四位仁兄淵源好深。
高永文話難估過六合彩
先講張偉麟，當年一齊喺港大讀醫科，同班同學仲有港大微生物學系系主任袁國勇。至於梁栢賢，就更係患難之交。沙士一役，高醫生與當時仲係衞生署副署長嘅梁栢賢並肩作戰，辛酸史多到講三日三夜都講唔完。而聶德權喺沙士年代，就做緊衞福局副秘書長，高醫生話，當年兩人就沙士調查報告上立法會解畫，相處多日，已變成好友。咁羅思偉呢？原來喺高醫生在任醫管局時，透過獵頭公司喺英國請返嚟，高永文可以話係佢伯樂嘞。
高醫生即場約定四位老友，話下次食「例行午宴」時，要預埋佢，梁栢賢第一個拍心口應承。卓妮叫高醫生預測醫管局CEO之爭，最後花落誰家，佢笑笑口話，梁栢賢同張偉麟都係實力派，戰況叮噹馬頭，真係難估過六合彩喎！果然係穩陣派。
卓妮