中環耳目：東瀛糕點大師殺入香江

陳裕光應邀主禮

間甜品店位於尖沙咀圓方，由於柴田武亦係藝術家，所以佢特邀古典音樂歌唱家久保田陽子到場演唱助興，喺悠揚曼妙嘅歌聲伴襯下，店內衣香鬢影，熱鬧非凡。應邀做主禮嘉賓嘅大家樂主席陳裕光（Michael）原來同柴田武相識十幾年，Michael好欣賞佢結合藝術同美食嘅超卓品味。卓妮問佢會唔會心郁郁開甜品店？Michael好客氣咁話：「唔會喇！都唔識做！」

轉頭卓妮見到王敏德一家五口嚟幫襯，太太Janet話畀卓妮聽，呢度嘅甜品好好味，所以帶埋仔女嚟食嘢。一家五口咁溫馨過家庭日已經夠sweet，又有至靚嘅法式甜品配搭，Janet實甜到入心嘅啫！

日本駐港總領事館署理總幹事松永大介都嚟撐場，佢一開口就嚇咗卓妮一跳，事關佢嘅廣東話真係講得唔錯，原來佢特登上堂學廣東話，至今已有年幾，勤學精神好抵讚。

王敏德（站立者右）同太太馬詩慧（右一）帶埋三子女齊捧場。

日本駐港總領事館署理總幹事松永大介，講得一口流利廣東話。