政情：南區補選匯賢泛民晒冷
南區補選投票喺嚟緊嘅星期日舉行，落場參選嘅兩方陣營不斷傳出火藥味，尋日大家仲把握機會各自晒冷添。匯賢智庫議員葉劉淑儀搵咗著名飲食節目主持人蘇施黃幫劉應東站台，當區前區議員、特首辦特別助理陳岳鵬亦不避嫌地請咗成個禮拜假幫手。公文袋都不遑多讓，請來一班泛民戰友搞個誓師大會撐司馬文，大戰一觸即發！
泛民喺政改一役一度分裂，尋日就難得團結起來迎戰匯賢。喺司馬文嘅造勢大會上，白鴿黨主席何俊仁現身撐場，社民連副主席吳文遠及民協嘅立法會議員張國柱都畀面出席。據聞白鴿黨中委通過動議支持司馬文，至於司馬文袋唔袋到佢哋嘅鐵票，就要睇過至知喇。
匯賢嘅劉應東都唔弱，蘇施黃尋日簽署咗支持同意書，公開支持劉應東參選，仲盛讚劉年輕實幹，係個難得有心人。葉劉又預告嚟緊會搵埋海洋公園主席盛智文幫拖，為劉應東站台。今次南區補選，建制派與泛民兩陣對壘在所難免，誰勝誰負，周日就會揭曉。