政情：馬會新主席唔識中文

施文信九九年開始做馬會董事，○八年獲選做董事局副主席，尋日佢話自己七○年已經來港定居，仲自爆娶咗位華人做老婆兼且有個囡囡添，不過都仲係唔識中文，所以唔係幾好意思喎（原文係I'm most apologetic）。

講番馬會嘅未來路向，本身係特許會計師嘅施文信乘機盛讚馬會多年嚟嘅工作令佢十分欣賞，所以將來會維持番依家嘅方向。做得馬會主席，施文信當然係馬主啦，依家佢以「欖球團體」經理人身份有一隻受咗傷嘅團體馬叫做「欖球樂園」，佢亦打算自己做馬主，不過尚在抽籤階段。

尋日嘅周年大會亦都選出香港體育學院主席李家祥接替退任嘅原馬會主席陳祖澤，成為馬會大董嘅行列。