政情：阿瑟王榮升爺爺 幫孫女改名
前教統局局長李國章（阿瑟王）上月喜事重重，繼上月到美國馬不停蹄分別參加姪仔及兩個好友子女嘅婚禮後，佢喺美國做醫生嘅孻仔李文俊（Peter）同新抱，就喺廿四日誕下一名千金。阿瑟王首度榮升爺爺，笑到見牙唔見眼，仲親自幫孫女改中文名，名為李德麗，而英文名就跟婆婆個名叫做Athena，名字源自希臘神話中嘅智慧女神。
美麗與智慧並重
阿瑟王嘅細新抱係希臘人，按當地傳統，生女改名要跟嫲嫲或婆婆嘅英文名，阿瑟王太太叫Diana，佢話如果孫女又叫Diana，可能會有啲亂，所以寧願佢跟婆婆叫做Athena。阿瑟王好開心話：「孫女中文名叫『德麗』，有品德又美麗，加埋Athena嘅智慧，就夠晒好啦！」嘩！美麗與智慧並重，咪有資格選港姐？阿瑟王就話呢啲遲啲先至講喎！
原本阿瑟王可以留喺美國抱孫，但遇啱醫學界前晚為行政會議成員「金刀梁」梁智鴻慶祝榮獲大紫荊勳章，加上日內又要陪TVB揸弗人「六叔」邵逸夫及「六嬸」方逸華北上內蒙、寧夏及蘇州巡視教育事業，所以專程返香港，完成行程後會再去美國探望孫女。據講阿瑟王嘅大仔Alex結咗婚無幾耐，問到幾時添丁，阿瑟王話要等Alex自己決定喎！