中環耳目：李思廉愛稻菊蝦蜆天婦羅
富力地產董事長李思廉經常中港兩邊走，對兩地嘅飲食文化好有研究，事關富力喺內地經營四間五星級酒店，包括廣州富力君悅大酒店同埋Ritz-Carlton等，可見佢對餐廳嘅要求極高。
具一百二十年歷史
卓妮早前喺富力業績發布會後捉住佢企埋一邊傾食經，佢盛讚中環ifc嘅日本餐廳稻菊（Inagiku），必食之選係大蜆天婦羅同埋日本蝦天婦羅。
李董果然係識食之人，事關超過一百二十年歷史嘅稻菊，正係靠天婦羅奠定江湖地位，依家稻菊喺香港有兩間分店，好多城中名人都係稻菊捧場客。李董至愛嘅大蜆天婦羅，係精選日本關東大蜆，加入日本椎茸菇同埋三葉碎後油炸，香甜蜆肉喺鮮甜多汁嘅椎茸菇完美配搭下，食落令人回味無窮。至於備受歡迎嘅日本蝦天婦羅，係以日本老虎蝦佐以優質芝麻油炸至金黃色後上碟，並備有海鹽、檸檬汁或天婦羅汁任君選擇。
