政情：陳祖澤得父助「上車」
樓市幾時都係香港炙手可熱嘅話題。唔好睇馬會主席陳祖澤官運亨通，當年上車話咁易喎。佢尋日就向傳媒自爆話，如果唔係佢當年爸爸眼光準，喺六七暴動兼樓市狂瀉時借錢畀佢買樓，相信佢都冇可能咁快上到車，仲話年輕人要置業從來都係咁難，鼓勵屋企人幫佢哋畀住首期先喎！
睇準六七暴動購豪宅
今日就卸任馬會嘅陳祖澤（John）尋日與傳媒茶敍。對於樓市，John笑言自己唔識睇，不過佢自爆自己喺一九六四年開始打工，即係打咗三年工時已經買咗樓，仲要係位於窩打老道山、有成千二呎嘅豪宅添，樓價七萬蚊。佢話當年佢爸爸睇準六七暴動「樓市跌到散晒」，借咗筆首期畀佢，佢好鼓勵屋企人幫助年輕人置業，亦都支持復建居屋。
今次係John第三次退休，佢直言自己仲係四間上市公司兼三間非上市公司嘅非執行董事，亦有多個公職喺身，嚟緊更會繼續跑馬，堅持自己愛好，所以不愁寂寞。