政情：社民連兩男為周澄罵戰
社民連秘書長季詩傑同身為社民連行政委員嘅「維園阿哥」任亮憲不和已經係公開嘅秘密，勢估唔到兩人竟公然開拖，導火線仲要係曾經自爆做過陪酒小姐嘅「大專2010」周澄，今次真係好睇過戲。話說有人喺facebook上面貼出一張社民連前日參加悼念馬尼拉屠殺事件遊行嘅相，相中有社民連內務副主席吳文遠、秘書長季詩傑，同埋財政彭義恍。
一張咁嘅相本來冇特別，問題出在周澄嘅側面亦都喺相中出現，任亮憲睇到即時發難回應：「又係呢個combination（組合），似乎唔使加入社民連都可以成為『核心』，唔怪知外面同傳媒都有咁多料！」明顯指周澄唔加入社民連，仲將黨中秘密通街唱。一向唔妥任亮憲嘅季詩傑反擊，話佢哋一向好包容任亮憲口快過腦嘅性格。
牙尖嘴利嘅任亮憲當然唔會忍，反寸曾經承認酒後胡言嘅季詩傑：「口不擇言、酒後亂噏者才是個口快過個腦。」當事人周澄對任亮憲都好唔滿意，直指那個係「看圖作文遊戲」。今次社民連力捧對象公開同室操戈，睇嚟社民連之後都好難風調雨順。