中環耳目：陳仲尼請老婆出山
首屆兩岸四地校園金曲「菁鶯獎」音樂大會賽尋日搞咗個啟動儀式，身為活動組委會執行主席嘅香港青年聯會主席陳仲尼（Rock）除咗落手落腳搞呢個活動外，尋日仲帶埋老婆區海倫出席啟動儀式，陳太仲擔任活動香港賽區評委添。
陳太區海倫以前曾經做過歌星，係組合ECHO嘅成員之一。阿Rock承認，係佢邀請太太出山做評判嘅，因為活動需要專業評判，既然太太做過歌星，搵佢就最方便！不過太太近年忙於照顧兩個小朋友，平時都好少機會唱歌，反而今年七歲嘅細仔就似乎繼承咗媽媽嘅歌唱天分，依家亦係香港兒童合唱團組嘅團員。
大細仔各擅勝場
阿Rock有兩個囝囝，大仔明日開學升中二，好有運動天分，係學校游泳校隊嘅代表。佢話大仔滑雪同滑水都好掂，平日不時會同個仔出海滑水，佢哋每年亦都會去日本滑雪。阿Rock自爆，有一次同個仔滑雪，囝囝滑落山再搭吊車返上去，佢就只係滑咗一小段路，搞到畀個仔笑；佢呼籲想學上述兩種運動嘅人要趁後生學，否則年紀大咗個人就好易虛怯，進步有限喎。