中環出更：楊顯中改良新菜胡椒蟹
上市公司港通控股董事總經理楊顯中（John）係識食之人，佢至愛佳寧娜潮菜嘅胡椒鹽焗花蟹，但卓妮發現佳寧娜嘅餐牌上並冇呢味餸，客人識叫至有得食。原來幾年前John喺新加坡食過胡椒蟹後念念不忘，於是同佳寧娜廚師經過五、六次反覆試驗後，終於炮製成功，難怪John笑稱呢道菜式係佢發明嘅。
一斤重花蟹最佳
灣仔佳寧娜呂店長話，佢哋大約年幾前同John一齊研究切磋，經過多次失敗後，依家係選用肉質厚、約一斤重嘅花蟹，伴以乾葱、紅椒、胡椒及紅椒角等佐料，放喺開咗蓋嘅瓦罉內烹調，再佐以玫瑰露同埋花雕，就係一道美味佳餚啦！
市民對港通控股可能感到陌生，但講到西區隧道、大老山隧道、香港駕駛學院同埋快易通等，就耳熟能詳啦！呢啲都係港通旗下業務，同市民生活息息相關架！