政情：周一鑊 你去咗邊？
香港旅行團浴血菲律賓，將一向「你有你生活，我有我忙碌」嘅香港人緊緊扣埋一齊，連各大政黨都喺嚟緊星期日罕有地一齊搞遊行。除咗民間空前團結之外，政府高官喺慘劇發生後都先後取消休假同外訪，返晒工作崗位隨時候命。
煲呔曾原定尋日赴福建出席泛珠三角論壇，為咗善後，已改派政制及內地事務局局長林瑞麟出席。政務司司長唐英年亦取消去歐洲推廣西九文化區行程，連原定本月卅一日至下月三日嘅休假都取消埋。保安局局長李少光原本由廿六日開始去內地同公安部門進行為期九日嘅交流，慘劇之後都宣布押後行程，坐鎮香港跟進事件。
同樣取消外訪行程嘅仲有商務及經濟發展局局長劉吳惠蘭，佢星期日其實已上咗飛機去丹麥同瑞士訪問，事件後即時取消行程，急急趕返香港，坐咗一轉「飛機河」。政府高官紛紛留港助陣，唯獨食物及衞生局局長周一嶽堅持休假，由廿四日放到月尾，下周一至返工，將返港傷者嘅治療統籌留畀副局長梁卓偉處理，相信香港人都想問句：「周局長你去咗邊？」