哎吔吔！又有小朋友跌落街，點解會咁o架？
尋日朝早七點左右，粉嶺嘉盛苑嘉明閣傳出一把稚嫩聲音叫救命。三十四樓有一名印傭望出窗外，當堂嚇到腳仔軟，竟然見到有個小妹妹危危乎掛喺三十三樓嘅晾衫架。大驚失色嘅印傭梗係想救人啦，即刻通知主人，兩人連隨跑落三十三樓，諗住拍門通知戶主幫手救人。
好不幸，三十三樓嘅單位拍極都冇人應。主僕兩人又跑番上去三十四樓，可惜一切已經太遲，小妹妹跌咗落平台，警方及救援人員到場證實一名六歲女童死亡。
大埔區重案組高級督察劉少南指出，家住三十七樓嘅女童媽媽早上大概六點出門買餸，期間女童瞓醒，走入廚房爬上一呎高嘅垃圾桶，估計係想去窗邊試下望唔望得見媽媽。廚房嘅窗係有安裝窗花嘅，之但係冇上鎖，相信小妹妹就係咁一失足成千古恨。
唉，又係獨留兒童在家累事。功夫茶都唔記得今次係第幾單嘞，總之就係一單接一單，似乎從來未停過。
香港人近日心情已經唔多好，親眼睇住菲律賓傳來槍聲卜卜嘅「死亡直擊」，一邊沉痛哀悼遇難同胞，一邊破口大罵廢柴賓警。家陣再整多單六歲小妹妹墮樓死亡，簡直係雪上加霜。
任得小朋友一個人留喺屋企真係可大可小o架，天下父母必須引以為鑑。你知啦，精力旺盛嘅小朋友最鍾意爬上爬落，一個唔覺意跌落街已經令人肝腸寸斷，而疏忽照顧嘅父母更加有可能惹上官非，事關獨留兒童在家係犯法o架，萬一心肝寶貝無端端枉死，而自己又淪為罪犯，直情就係雙重打擊。
即使你鎖好窗花防止細路仔墮樓，獨留兒童在家仍然好鬼死得人驚，畢竟對於未懂事嘅小朋友嚟講，屋企其實係一個危機重重嘅地方，甚至可以話係一步一驚心。菜刀隨時割傷，枱櫈隨時夾頭，爐灶隨時着火，窗簾繩玩下玩下又有機會變成吊頸。所以話啫，小朋友真係睇少一眼都唔掂。
特區政府假如誠心誠意以民為本，實在有必要加強宣傳教育，清清楚楚向所有家長傳遞一個訊息，就係千祈千祈千祈唔好獨留兒童在家。墮樓意外一次都嫌多，何況已經發生過Ｎ咁多次嘞。大概十日前之嘛，荃灣福來邨就有五歲男童從三樓跌落街，好彩大難不死咋，不過小朋友嘅阿媽就被警方拘捕。
岳飛《滿江紅》有幾句係咁嘅：莫等閒，白了少年頭，空悲切。計功夫茶話齋，加強宣傳莫等閒，否則咯喎，害了少年頭，空悲切！
記住，你以為最安全嘅地方其實係最危險嘅，菲律賓如是，你屋企如是。容許功夫茶講多次，千祈千祈千祈唔好獨留兒童在家！